文章
相簿

Travelling @ somewhere(2005-2009年)

台北7天之旅 - 拍攝婚紗照花絮

Vanlily Cake 於 2008年04月23日發表   人氣:1057


今次去台灣最主要的目的, 就係去影婚紗相~ 我地個間係叫費加洛, 係婚紗展時join的~

落機係酒店check-in, 就有粉紅色私家van來接我地去, 地點係位於府中站~

試左好多件婚紗晚裝, 試衫都試到支力啊~ 但佢地既衫的確唔錯, 唔會太老土又夠新! 我最鐘意佢地既婚紗, 件件都好靚~

第2日早上, 9:00就要去到, 化妝師就先同我化妝, 陳生呢個時候就去揀禮服~

化妝set頭約個幾鐘, 就先係一個預設的室外場地影左一輯相~ 然後再換上第一件婚紗, 太約11:30就出發到北投了~

當然, 我的傻瓜機也要出發了!!!

呢度就係北投的溫泉湖~ 來到後好開心, 呢度個景好特別呢~ 影出來個效果都好好~ 

跟住就坐左一陣車, 到呢個瀑布到影相~

係瀑布前個一刻真係好興奮!! 無唸過可以係呢度影相!!!

拿! 係瀑布前面...披著婚紗, 仲要著住波鞋, 咁樣影結婚相係咪勁有型先?!?

之後我地又坐車, 去左一個叫"農場"的地方~ 都係我要求的!

入到來, 差唔多有10對新人係度影相啊! 不過呢度夠大, 而且好多地方都可以取景! 所以都唔會有咩問題!

我束紅玫瑰靚嗎?! 係真花來啊~ 台灣買鮮花其實好平........

之後就去左........新西蘭!!! 似呢~ 

唔好以係為我地係呢個平地影, 我地其實係係.....右手邊個d樹幹入面影啊!!! 好有feel啊!! 勁!

之後就出發去我至愛的淡水囉~~

我地先去到海邊, 然後就係企係呢條木上面影!

有藍天, 有白雲, 仲有數著浪花一朵朵~

根住就來到呢間教堂~

我揀左第二件婚紗個尾係好長好長既, 係呢條樓梯到影就fit哂喇~

最後最後, 就到影得最靚既日落景啊~

攝影師因為前排天氣唔好, 好耐無影過咁靚既日落, 所以係度影左好多相啊!!

我地揀左個張大相都係係呢度影啊!!

因為我地唔要那些室內高貴晚裝照, 所以到6:00就成個行程完畢喇~

呢包牧場鮮奶土司, 就成為我同陳生這天的午餐了~

可能我地無影室內照, 加上一個景點去另一個景點時, 都可以上車休息下! 而且當日天氣好好, 唔會太熱又有微風! 所以我地影得好舒服好開心!

拍攝後第二日去揀相時, 我地的"快、狠、準"方法揀相都揀得好順利喇~ 呵呵!

今次拍攝真係好開心, 我指係個過程開心, 其實拍攝相片的效果都係其次啊~

可以留下一個咁美好的回憶, 比任何物質的野都重要!

=============================================================

如果你都有興趣去台灣拍婚紗相, 可以留意以下的注意事項, 要特別多謝綠萼的提點啊! (又或者你地有無同樣經驗, 不妨都留個言比我啊~ 我相信好多人都有用啊)

1) 最好前一個星期就每日做mask, 雖然話電腦可以執, 但係唔夠水份, 上妝會好難啊~
拍攝當日早點起身, 再做一次mask就最好了
2) 女生要帶一對白鞋, 男生就帶一對黑鞋, 仲有黑, 白袜各一對
3) 男生可以帶自己鐘意既恤衫/牛仔褲, 其中一個場景係會用得著的
4) 雖然台灣人化妝較淡較自然, 但落妝都係一個問題, 我係先用化妝棉(都用左成4塊)抹哂先再用卸妝
5) 當日會用上大量定型水, 洗頭一定要先用幾次護髮素, 才可用洗頭水, 記得帶定去/去到台灣屈臣氏買
6) 台灣人唔會比你著Girdel, 一來你著住又影得唔自然, 二來佢地d衫好薄好貼, 現哂型啊
佢地會叫你戴Nubra, 即砵仔糕, 朋友話台灣屈臣氏有得買, 但我搵唔到! 我間婚紗公司賣hk$600
7) 化妝前佢實話會同你加d乜乜精華素, 如果幾百蚊都ok, 因為個化妝師會跟你成日啊!
但我朋友就要加錢帶多個化妝師外拍,我需要大約港幣900, (條數一樣), 不過又有人試過被逼加好多錢租車,帶化妝師又加HKD2000, 最後壓左好多價!
8) 試衫要試到鐘意為止, 我呢間既衫都唔錯, 尤其婚紗, 記得揀晚裝要揀唔同款的, 影出來要有唔同效果~
9) 要問清楚係條街到點換衫, 我個間係用"一人用露營幕", 應該係比人換衫專用的, 然後係個街到叫陳生幫我係入面換既~
如果無, 就要問清楚外拍有無女工作人員幫你換衫,去到D郊外地方洗手間, 有人試過,出去O個個係男化妝師, 佢地叫新郎響"殘次"幫佢換,但新娘係基督徒,所以搞到好麻煩.
10) 問清楚成品既RESOLUTION,係咪執O左 O既相都可以放到好大.朋友O個間好衰,執O左O既只係細RESOLUTION相.
11) 去到影相, 如果你唔鐘意既場景就唔好浪費時間去影喇! 到時影左都唔知要唔要好!

 


上一篇: 台北7天之旅 -- 蛋糕書, 烘焙用品, 繽紛蛋糕房

下一篇: 台北7天之旅 -- 士林, 市政府, 中孝敦化, 永康街


本BLOG人氣文章

Happy 2018
真係好耐無寫blog啦~  ..
www.vanlilycake.com
YEAH!!! 終於可以做到自己的網址啦..
蒸蛋糕@東芝變頻色蒸氣微波爐
新爐實在太多食譜想試, 先來一個簡單但不..
繼食譜書後, 第二本新書已經出左啦~ ..
東芝變頻式蒸氣微波爐@功能篇
之前在abc cooking studi..
東芝變頻式蒸氣微波爐@abc cooking studio
好開心得到香港東芝變頻式蒸氣微波爐的邀請..

Vanlily Cake

用甜來分享愛! Vanlily Cake 希望每個人, 包括血醣過高的, 有蛋奶及麩質敏感的論, 都能品嚐甜蜜的味道


最近的POST
累計瀏覽次數: 6,835,284
所有文章: 1,746
本日訪客人數: 1,946
累計訪客人數: 3,426,676